über de Tellerrand koche :)

Ich dörf mich zu de glückliche Persone zelle, wo finanziell durch d Mecator Stiftig unterstützt wird. Beste Dank nomol dafür! Durch das Stipendium hani de Uftrag übercho, es Projekt in Costa Rica durchzfühera. Do ich i minera Freizit sehr gern koche und au sehr interessiert am Esse in andere Kulture bin, hani mi dafür entschiede, mit minere Gastfamilie oder anderne Iheimische z koche. Aschlüssend möchti es Rezeptbuech erstelle mit all dem, woni do glernt und kochet han. Ob mir das würkli so glingt, wie ich mir das vorstelle, erfahred ihr den do. Usserdem wöti eu natürli die feine Rezept nid vorenthalte ;).

UPDATE Projekt

Grundsätzlich hani miar jo vorgstellt, dassi ime Kinderheim schaffe werd und döt mit de Kind Zit verbringa und ab und zua mol mit dena cha koche. Do i ez aber inera Schual schaffe & die Kind döt dure unterstütze, hani kei Möglichkeit ka, mit de Kind direkt z koche. I ha aber sehr oft mim Gastmami gholfe & zuagluagt. Zuasätzlich hani z Mittag amel ide Schual döfe esse, wo au nur Gricht us Costa Rica kocht worde sind. Momentan bini au dra, all die Rezept ime Kochbuach zemmezfasse. 

Grundsätzlich sind d Gricht in do immer recht ähndlich und es schmeckt au alles recht glich.. Ide Schual hets vor allem immer Ris und Bohne geh mitera Bilag wia z.B. Herdöpfel mit es biz Fleisch. Sie essed sehr viel Kohlehydrath, so het min Gastpapi aumol gseit ka, dass er am liabste Ris mit Nudle isst. Wenme ime Resti z.B. Ris mit Poulet bstellt (isch den so wie bim Chines, "gebratener Reis") kriagt me dezua no Pommes, Chips und Salot. Oft isch au so z.B, Herdöpfel oder Nudle d "Bilag". Sehr speziell für mich aber me gwöhnt sich dra. Es wird gseit, dass me in Costa Rica seeehr viel Fleisch isst. Da chani nid ganz bestätige, mol zumindest was ich gseh han. Mis Gastmami kocht zwor immer jedes Gricht mit Fleisch (es git oft en Itopf) aber da isch den nid würkli e Stuck Fleisch wie mir das kenned sondern meh eifach es bizeli. Also so wird z.B, 1 Pouletbrüstli im ganze Topf verteilt. Mir isches aber au recht. will s Fleisch do nid würkli de Hit isch. Ide Schual hets au nid viel Fleisch geh aber da lit sicher au do dra, dass da mega tür wär für all Kinder Fleisch z koche. 

Wie bereits gseit, isch für min Gschmack Kuchi eher es biz "langwilig", au wenns mol öppis anders git, schmeckts irgendwie trotzdem wie alles andere. Sie würzen Ihri Gricht au nid richtig, sondern koched fast alles mit Koriander. 

So noch sechs Mönet freui mi also meeega uf s Esse dahei!! 

Ris, Ris ah und nomol Ris

Ris gits do eigentlich immer, egal welli Mohlzit.. Entweder gits Ris mit Bohne oder Bohne und Ris, Nei Spass, Ris und Bohne isch eifach s typische Gricht fu Costa Rica, es heisst "Gallo Pinto" und wird vor allem zum zmorge serviert. I has zwor schomol gessa aber s Rezept und kochet hanis nonia, desswega chunt da erst spöter ;). Jedoch hani scho eifach "normale" Ris kochet, wo do aber chli anderst zubereitet wird wie ich dahei glernt han. 

und zwor ischs aber trotzdem ganz eifach: 

- Zwieble

- Peperonie

- Koriander

dia drü Zuatate chli hacke und den mit echli Öl abrote.. aschlüssend de Ris dezua geh und mol chli umrüehre. nocher no s Wasser dezuageh. Ungefähr soviel Wasser, bis de Ris chli meh als "zuedeckt" isch. Aschlüssend das 12 - 15 Minute köcherle loh. Fertig :) Wie gseit, sie essed do zu allem Ris, egal wases git. Desswega döf da "eifache" Rezept nid fehle :)