Sit genau einem Monet bini wider zrugg ide Schwiz und ha mi wieder voll igläbt. Ehrlichgseit, isch mir s ileba nid würkli schwer gfalle, i ha mi aber au risig druf gfreut zum wieder hei z go. S Kapitel "Costa Rica" isch für mi somit verbi und es isch e rise erfahrig gsi. I ha viel sache erlebt & glernt und nimm viel mit id zuakunft. Obis nomol macha wür? hm i glaub nid i dera Form oder nüm so lang. Wia gseit, es isch e rise erfahrig gsi aber es het au viel sache geh, wo für mi nid passt hend. Aber i find, dia erfahrig mua jede selber macha. Es git Lüt, wo amel gar nüme zurgg hei wönd und denn gits eba au dia lüt wia mich, wo sich recht freued zum wieder hei z go. 

I find aber, es lohnt sich da mol z wooge! Es isch öppis, wo dir niamert chan neh und me lernt so viel drus! Desswega woog di in das Ungwüsse und probiers us! Liaber drus lerne als immer denke "weni das doch nur gmacht het.." ;). 

Somit isch das au min letschte Blogitrag. I bedank mi nomol recht herzlich bi allne, wo mi i dera Zit unterstützt hend! 

Einersits natürli ICYE Switzerland wo alles agfange het sowie de Mercator Stiftig für die finanziell untersützig!! Den natürli au ACI Costa Rica wo immer do gsi isch für üs Volunteers! A mini Gastfamilie und all dia andere Volunteers mit dena i super Zite ha döfe erlebe! 

Januar - die ander Site fu Costa Rica

Hüt weti mol biz verzelle, wieni mi im allgemeine do in Costa Rica fühl und wie Costa Rica uf de ander Site usgseht.

Bevori noch Costa Rica bin hani denkt ka, dass Heiweh kei grosses Thema si wird. Jede seit jo au immer, wie schnell es halbs Johr verbi goht & dasi do so viel neus erlebe, dassi fast gar kei zit han zum über s Heiweh noh zdenka. 

Guat, weni so zrugg luaga, goht es halbs Johr recht schnell ume. I muass aber au glichzitig sega, dass es miar ab und zua ewigs vorchunt. Grundsätzlich hani sit em Afang recht müeh mitem Heiweh, will do alles eifach biz anders ablauft alsi miar da vorgstellt han. I cha eu aber au nid würkli sega, wasi erwartet han. Ufjedefall muassi sega, dass ich seeehr viel Freizit han und ich oft gar nid weiss, wasi söt astelle damit. "Rueh di biz us" meint mis Gastmami amel aber jo aso e halbs Johr usruabe wär scho gad esbizli lang. Durch dia wenig beschäftigung isch miar denn au recht viel langwilig. Logisch, i probier soviel wie möglich öppis unterneh und nöd eifach nur dehei umehogge. Jedoch isch halt au s Problem, dass me in San Jose selber nid viel unterneh chan ussert ine Kaffii z sitze oder is Kino z go. Zusätzlich hemer im Projekt au sit em Dezember nüt z dua will d Kind no Ferie hend und denn isch üs amel döt scho langwilig.

Vor allem i dem Punkt isch min Ufenthalt do in Costa Rica nid so wieni miar da vorgstellt han. I kenn aber viel Volunteers, wo nid würkli viel arbeit hend und meh eifach biz am "umechille" sind. Für e Zit isch das jo au völlig okay aber irgendwenn macht da würkli kein Spass meh. 

Wie bereits gseit, probieri soviel wie mögli chli unterwegs z si und Zit so umezbringa. 

Langsam bini würkli froh, dass min Ufenthalt do z Costa Rica z end goht. Es goht zwor no es bizli aber es chunt immer nöcher. :) 

I bereus aber nid, dassi all das do gmacht han aber i glaub i würs nid nomol macha. Es isch e riese Erfahrig und me lernt seeeehr viel. I glaub de Wert fu dem gsehni den richtig, weni wieder ide Schwiz zrugg bin. 

I ha do in Costa Rica leider au sehr viel trurigs gseh. Jede Morge, weni id Schual gang und durch San Jose laufa, hets mega viel Obdachlosi.. Viel schlofed den meistens no in ihrem Karton am Strosserand. Anderi durchsueched de Müll oder frogen Passante, obs ihne öppis z Esse kaufend. I weiss nid, warum die Lüt uf de Stross lebed und nüt schaffed, desswega wöti do drüber au nid urteile.

Es git aber au Sache, womi recht "verschrecked". Mini Schual isch ime schlechtere Quartier wo au recht viel Obdachlosi & Drogesüchtigi lebed oder sich umetribed. Zum Bispiel bini gad gest mit de Kollegin d Stross duruf glofe, als sich gad drü Persone schnell irgendwelchi Droge inezoge hend voreme Kiosk. Da passiert döt alltäglich, als obs s normalste uf de Welt isch. An so Sacha chan ich mich als Schwizerin nid dra gwöhne. Jede Tag passiered eigentli i dem Quartier so Sache und am Afang hets mi au recht migno, dass üsi Schüaler das jo alles au gsehnd. Jetzt weissi aber, dass die Meiste in so Quartier lebed und für sie da de Alltag isch.. Es isch trurig, dass sie unter so umständ müend ufwachse und nüt degega chönd mache. Umso meh freuts mi, dass die Schual ihne wie biz es zweits dihei schenkt wo sie öppis chönd lerne und z Esse überchömed. 

Costa Rica het zwei Site. Es git die, fürd Turiste und denn gits die Iheimische. Logisch, dass gits i allne Länder aber i has nonie selber so erlebt wia do. Es goht zum Glück au nid allne Iheimische so schlecht wieni obe erwähnt han.

All die Idrück sind aber e riese Erfahrig für mi!

Dezember! 

Im Dezember werden do sehr viel Fest gfiret und au ide Schual hend d Kind nüm würkli gross Unterricht ka. D Kind hend ab mitte Dezember bis am 14.01.2019 Ferie und au s Personal het ez sit em 21.12. Ferie. :) Somit hani biz Zit zum go reise go und Costa Rica entdecke. 

Im Dezember wird do vor allem öppis gesse; Tamales. Es bestoht useme Maisbrei mit Gmües und Fleisch und wird denn in Palmblätter igwicklet und so nomol zwei Stunde kochet. Mit minera Gastfamilie hemer rund 70 Tamales gmacht, de ganz Samstig simer dra gsi wills recht viel Arbeit isch! Aber miar hets sehr viel spass gmacht ka :) 

An Heiligobig hemer Wiehnachte gfirtet mit de Grosseltere, de Familie fude Schwöster und natürli minera Gastfamilie. Wiehnachte do isch es biz speziell. Alli Läde hend grundsätzlich normal offe, niemert wünscht sich gross "schöni Wiehnachte" wia miar das kenned ide Schwiz und au süst wirds eifach anderst gfiret. So bini zum bispiel de ganz 24.12. dahei gsi und ha gwartet bis mol öppis passiert :D am 18.30 sind denn d Verwante cho und mir hend Kaffi trunke und natürli Tamales gesse. Dano hemer d Nochrichte gluagt, wia sich das do natürlich ghört. Denn um dia 20.30 hens verusse agfange "füre" und mis Gastmami het s Fleisch grichtet. Z nacht gits also grillierts und zum Glück mol kei Tamales! :D so hemer ganz gmüatlich vorzua biz gesse, es het Fleisch geh, Tomatesalot, Tortillas und Nachos. Am 23.00 hemer üs den Gschenkli geh und denn sind alli au scho wieder gange. :) für mi ischs speziell gsi, wie sie wiehnachte fired aber da lit sicher au dra, dass es mi meh an en Grillobed wia bi üs ide Schwiz erinneret het als an Wiehnachte. :D Es hetmer aber natürli gfalle und es isch en würkli schöne und gmüetiche Obed gsi. 

Mini Familie firet nid "no meh" Wiehnachte wia i da fu dahei kenne, zum Bispiel am 25.12. + 26.12. Sie hend "nur" am 24.12. gfiret. 

Über Silvester werdi mit anderen Volunteers an dia karibisch Küste go, gnau gseit Cahuita. Dano isch den auscho wieder Januar und de Februar somit au mini Rückkehr id Schwiz chunt immer nöcher. I ha do scho vieles erlebt und so viel, liabi Lüt kenneglernt. Trotz allem aber freu i mi mega druf, zrugg id Schwiz go und döt mini Familie und all mini Fründe wieder z gseh! :)

November / Halbzit! 

Es git einiges z' verzelle :D Im 2. Wuchanend bini mit de Kollegin und ihre Familie zwei Täg an Strand in Nosara und zwei Täg im Spa Hotel "Tabacon" gsi. Das Hotel isch in La Fortuna in Monteverde. Fu döt us chame de bekannti Vulkan "Arenal" gseh, soferns nid neblig und/oder bewölkt isch (isches aber leider fast immer). Mir hend de Vulkan nur ganz churz emol gseh aber leider au nid de ganz. Was aber dafür sehr cool gsi isch, sind dia "Hotsprings". S'Wasser isch fum Vulkan her ganz warm (38 Grad) und es isch alles wunderschön gmacht. Somit chame au bi rege ohni Problem go bade. Isch mega entspannend und minera meinig no en Bsuech wert! 

S Wuchanend druf bini mit 27 andere Volunteers noch Panama greist. Alli 6-Mönet Volunteer hend "nur" s'normale Touristevisum und chönd desswega nur 90 Täg in Costa Rica blibe. Desswega müamer noch 3 Mönet Costa Rica für 72h verloh. Mir sind gnau gseit noch "Bocas del Toro" greist. Es isch wunderschö gsi! zwei Täg fu dena vier simer eigentli nur am reise gsi. Am erste Tag z Bocas simer ufe Tour gange miteme Boot und sind uf verschiedeni Insle. Zuesätzlich simer ind "Fledermushöhli" gange. E rechts Abendtür isch das gsi! De nöchst Tag simer den ganz gmüetlich an bekannte "Seesternestrand" gange. Wies de Name scho seit, gits döte sehr viel Seestern. Superschö gsi!

Naürlich bini do z Costa Rica nid nur am reise sondern au am schaffe. Wie im letschte Post erwähnt, hani endli mitem Projekt chöne afoh. Leider hani im Projekt fast nüt chöne mache und will de Strike immerno isch, sind oft Lektione usgfalle oder d Schüeler sind nid cho.. Somit hani sehr viel Freitzit ka und mir isch oft sehr langwilig gsi.. Dur da hani mi oft sehr "nutzlos" gfühlt und mi gfrögt, wieso dasi überhaupt do bin.. sicher bini au do zum chli umereise und Costa Rica z entdecke aber vor allem hani do wölle Freiwillige Arbeit leiste und irgendwo chöne mitzhelfe. Durch es Gsrpöch mit ACI (Organisation) hani d Möglichkeit übercho, mis Projekt z wechsle. I schaff ez inera andere Schual in San Jose. I der a Schual sind vor allem Kind us arme Verhältniss. Zerst essemer mit de Kind z'Morge und aschlüssend göns in Unterricht. Den gits z'nüni und spöter den no z Mittag. Nochem Mittag hens nomol Unterricht bis am 1. Dano chöns je noch dem Heigo oder sie hend no Chor z.B. Es paar Kind blibed aber immer bis am 3 und mir spieled i dera Zit mit ihne Brettspieli oder süst öppis. D Kind sind i dera Schual nid noch Alter sondern noch Wüsse iteilt. Es git 3 Stufe und Kind sind zwüschet 7 - 17 ungefähr. Die meiste sind aber so 7 - 12. 

Im alte Projekt sind aber immer alli mega nett gsi und i hami immer willkomme gfühlt! I bimer au sicher, wenn da mitem Strike nid gsi wär, wür die ganz Situation au ganz anderst usgseh! Wie bereits erwähnt, hani s Projekt nid gwechslet will irgendöppis vorgfalle isch oder ich mich nid wohl gfühlt han sondern eifach, wili chum öppis z dua ka han und grössteteils meh umeghockt bin und gwartet han.. Plus heti au bald mega viel Feri ka (fast 2 Mönet) woni keeei ahnig ka het, wasi i dera Zit mache söll.

Wie Ihr gsehnd, isch im November sehr viel los gsi und scho bald isch Dezember! Ufjedefall isch mini Gastfamilie scho ready für Wiehnachte, s ganze Hus isch scho dekoriert! 

somit wünschi eu ez scho e schöni Adventszit und bis bald!

Oktober! Start im Projekt :)

Am 12.10.2018 hani endlich chöne mit mim Projekt afoh! I schaff anera High School (CTP Aserri) als "Lehrer Assistentin" (soferns das überhaupt git:D). I dörf verschiedenli Lehrpersone im Englischunterricht unterstütze. D Schüeler sind sehr respektvoll und lustig. Am Afang hani chli Respekt devo ka, will d Schüeler nid vieeel jünger sind als ich.. Desswega hani nid gnau gwüsst ka, wiefern sie mi überhaupt "ernst" nemmed. Aber sie hend sehr viel Respekt, glichzitig hemers aber au sehr lustig mitenand. Am meiste lache chöns vor allem, wenn i probier Spanisch reda :D.

Die High School isch speziell ufbaut. D Schüaler chönd/müand bereits abem 1. Johr e bestimmts "Hauptfach" uswähle. Es git momentan 10 Hauptfächer (z.B. Rechnigswese, Architektur, Grafikdesign, Tourismus etc.) Sie lernen i dem Bereich alles theoretische und im 2. & 3. Johr hens d Möglichkeit, es Praktikum z absolviere. Nochem Abschluss mit ungefähr 18 Johr, chöns den direkt ins Bruafslebe istige, sofern sie das möchten. 

Dia erste Wucha z Costa Rica

so ez ischs sowit. I bi z Costa Rica acho und bi ez scho fast drü Wucha do.  

De Abschied am Flughafe Züri ischmer schono recht schwergfalle.. aber woni den im Flüger ghockt bin und mir gedanke drüber gmacht han, wieso dasi eigentli uf Costa Rica gang hani mi mega gfreut. Am Flughafe z San Jose bini den seeehr herzlich fu minera Gastfamilie empfange worde. Ischmer vorcho als obmer üs scho ewigs kenned. Aber da isch do eso, d Lüt sind mega offe und herzlich. 

Am Donnstig hani den dia andere Freiwillige kenneglernt. Dia erste 2.5 Wucha hani mit ihne verbrocht. Einersits hemer viel über Costa Rica und d Kultur kenneglernt, wie me sich verhalte söt etc.. Dia letscht Wucha hemer den Spanischkurs ka. Do drüber bini sehr dankbar, wili ez scho einiges meh verstoh und weiss. Am Mäntig söti eigentli mit minem Projekt afanga ade High School, wills aber am Mäntig us irgendwelche Politische Gründ striken, hend alli öffentliche Schuele gschlosse. Also fangi mol sicher nid am Mäntig ah. Wie lang de Strike goht, weiss niamert. Aber i gang mol devo us, dasi am Zistig afanga werd.  

Süst chani eu nonid viel fu Costa Rica verzelle, han bis ez vor allem San Jose und San Pedro gseh. San Jose gfalltmer ehrlich gseit gar nid.. s het mega viel Lüt, viel Verkehr und entspricht nid gad de Vorstellige wenn me an Costa Rica denkt ;) Das isch miar aber natürlich au bewusst gsi, dasses ide Stadt selber nid so schö isch wie ame Strand oder im Regewald. San Pedro hingega isch schön, ruhig und übersichtlich. An einem Tag hemer mit allne Volunteers en Usflug gmacht, a chlini Wanderig. Paar Fotis devo gsehnder ide Rubrik "Fotos". 

De nöchst Itrag wird den über mis Projekt si und hoffendli au über dia erst Reis :)

Hasta luego!